LAOAG CITY – Naka-activate ti Incident Management Team ti Department of Social Welfare and Development iti Region I kadagiti uppat a probinsya iti Rehion pakairamanan iti Field Office da iti San Fernando, La Union gapu iti iduduprak ti Bagyo Paolo.
Daytoy ti inbatad ni Miss Marie Angela Gopalan, ti Regional Director ti Department of Social Welfare and Development iti Region I.
Kuna na nga addan dagiti maaw-awat da a report kadagiti nagduduma a lugar it rehiyon uno a makapaspasar ti napigsa a tudo ken layos.
Inrakurak pay ni Gopalan nga addan dagiti report a naibakwit a pamilya iti nagduduma a probinsya iti rehiyon Uno.
Nupay kasta, kuna na nga awan pay ti naibunong da a family food packs gapu ta saan pay a nakaisumitir ti official report dagiti lokal a gobierno kadagiti apektado a pamilya a masakupan da tapno maamoan no mano ti bilang no ania dagiti kasapulan da a tulong.
Iti baet daytoy, inpasigurado ni Gopalan nga ado dagiti nakasagana a tulong a maipaay kadagiti nagduduma a probinsya no agkiddaw dagiti maseknan a Local Government Units.
Inpalagip ni Gopalan a saan a ti Department of Social Welfare and Development ti mangidaulo iti pannakaibunong dagiti nagduduma a relief goods no di ket nakadepende da iti datos ken kiddaw ti lokal a gobierno.
Innayon na a no adda dagiti lokal a gobierno nga agkiddaw ti relief goods ket adda dagiti representative ti Department of Social Welfare and Development iti Region I a mapan mangimatang iti pannakaibunong dagitoy tapno masungbatan da a dagus no adda ti pakaseknan dagiti umili mainaig iti naawat da a food packs.
Kabayatanna, inbatad ni Gopalan a ti warehouse a rinaot dagiti kameng ti Criminal Investigation and Detection Group ken ti tiniliw da a maysa a babai gapu iti panaglaklako na ti relief goods ti Department of Social Welfare and Development Office nga agbalor ti P15.5-milyon a pisos ket saan a konektado iti opisina.
Inpetteng na a naiget a konkondenaren ti Department of Social Welfare and Development ti pannakausar ti logo ti ahensya tapno maallilaw ti publiko.
Inpasigurado ti ahensya a nakasagana da a makitinnulong kadagiti otoridad para iti isaysayangkat da nga imbestigasyon ken ti panangipatungpal ti maiyannatop nga addang.
