LAOAG CITY – Marigatan ti Department of Social Welfare and Development – Region 1 a mangidanon dagiti food packs kadagiti naapektaran ti Bagyo Emong ken angin abagat gapu iti nakaro a layos.
Segun ken ni Mrs. Marie Angela Gopalan, Regional Director ti Department of Social Welfare and Development – Region 1, naiget ti pannakikoordinarda kadagiti nagduduma a Local Government Units kadagiti nagduduma a probinsia iti rehion uno tapno mapaalisto ti pannakaipaay kadagiti food packs.
Inbatadna a malaksid iti mapaspasaran a nakaro a layos ket adda pay dagiti natulid a dadakkel a kaykayo a nangitunda ti pannakaabbeng kadagiti kalsada a pagdalyasatan dagiti lugan a mapan mangitulod kadagiti food packs.
Inlawlawagna nga addan ti sumurok 37,600 a family food packs ti naibunongen no sadinno a kaaduan ditoy ket iti probinsia ti Ilocos Norte nga addaan ti 8,742, simmaruno iti La Union nga addaan ti sumurok 7,800, iti Pangasinan ket addaan ti 7,300 ken 3, 600 iti Ilocos Sur.
Kunana nga adda ti 19 a warehouse ti ahensiada isu nga adda dagiti nakasagana a maala a food packs nga asideg kadagiti nagduduma a lugar.
Innayonna nga adda ti mobile kitchen nga agturong kadagiti sumagmamano nga evacuation center tapno mangipaay kadagiti taraon para kadagiti evacuees.
