LAOAG CITY – Inbatad ni Mr. Dominador Alberto, OIC ti Consumer Protection Division iti Department of Trade and Industry ditoy probinsya a kaadoan kadagiti supermarkets ket sumursurot iti naikeddeng nga SRP basar iti monitoring dagitoy.
Inlawlawag na nga iti delata kas iti sardinas ket ngimmato agingga iti nasurok piso ti presyo na no ikumpara iti SRP idi Enero 27 ken ti SRP a naipatungpal idi mayo 11.
Segun kenni Alberto, sumagmamano kadagiti brand ti sardinas ket nagipangato ti presyo na no sadinno manipud P16.60 ken nagbalin a P17.25 wenno P16 ket nagbalin a P17.25.
Mainaig iti daytoy, kunana a karaman kadagiti imonmonitor da ket ti suplay dagiti kangrunaan a magatgatang no sadinno ditoy probinsya ket makaanay ti suplay dagitoy.
Kunana a kaadoan kadagiti produkto a mailaklako ditoy probinsya ket linawas ti panagsangpet dagitoy ken imenmentenar da ti buffer stock a makaanay iti uneg ti dua a bulan.
Kabayatanna, kinumpirmaran ni Alberto nga adda dagiti establishimento a nababbaba ngem iti SRP ti panaglako da.
Mangnamnama met ni Alberto nga awanen ti panagngato ti presyo dagiti kangrunaan a magatgatang.
