LAOAG CITY – Opisyal nga inyuswat ti Department of Trade and Industry (DTI) ti P4-billion MSME Business Fund a mangidiaya kadagiti micro, small, and medium enterprises (MSMEs) ti baro a lifeline tapno mapatalged ken mapalawa ti operasyon da iti baet ti mapaspasaran a krisis iti Middle East.
Daytoy ti inpakaammo ni Department of Trade and Industry Secretary Ma. Cristina Roque.
Segun ken ni Roque, mapalubusan dagiti kwalipikado a micro, small, and medium enterprises (MSMEs) nga umutang manipod iti P30,000 agingga iti P20 million, a daytoy ket mabayadan agingga iti lima a tawen.
Inlawlawag na a para kadagiti umutang agingga iti P5 million, awan ti maipaay a collateral ken maikkan dagiti borrowers ti maysa a tawen a panaginana sakbay a rugyan da ti agbayad, agpada ti puunan ken interest.
Innayon na nga inpatungpal da ti nasao a programa tapno masigurado nga agtultuloy ti operasyon, makagatang kadagiti raw materials, equipment, ken maipalawa dagiti negosyo wenno makaipatakder ti aniaman a baro a negosyo iti baet ti oil crisis nga epekto ti agtultuloy a tension iti Middle East.
