LAOAG CITY – Inpetteng ni Department of Trade and Industry (DTI) Secretary Christina Roque nga umanay ti ₱500 para iti simple a Noche Buena.
Depensa daytoy ni Roque kalpasan ti nagsasaruno a pammabalaw kenkuana.
Inlawlawag ni Roque a depende latta ti nasao a balor ken no mano a pamilia ti agsasango.
Inbatadna a ti P500 a pang-Noche Buena inton paskua ket para iti pamilia nga addaan ti uppat a miembro.
Inpaganetget ti sekretario a ti nangibasaranna iti daytoy ket ti mismo a Noche Buena price guide ti Department of Trade and Industry a makita iti social media accounts ken website-da.
Dinakamat ti sekretario dagiti sumaganad:
Spaghetti noodles – ₱30
Spaghetti sauce – ₱48.50
Macaroni noodles – ₱40.95
Mayonnaise – ₱55
Cheese – ₱56.50
Kunana a ti Christmas ham ket ₱170, ti pinoy pandesal a 10 a pedaso ket ₱27.75.
Agbalor amin dagitoy ti ₱428.70.
Inlawlawagna a mabalin daytoy a nayonan ti fruit salad no adda pay ti budget no sadinno ti:
Fruit cocktail – ₱61.75
All purpose cream – ₱36.50
ken ti total ket ₱526.95.
Innayonna nga adu pay ti brand a mabalin a pagpilian ti publiko nga umdas iti budget-da.
