LAOAG CITY – Binalakadan ti PNP San Nicolas dagiti dua a babbai kalpasan a nasita dagiti pulis iti panagtalinaed da iti ruwar ti dakkel a mall iti ili ti San Nicolas
Segun kenni Police Major Joseph Baltazar, hepe ti PNP San Nicolas, saanen a napilaan ti reklamo dagiti dua a babbalasang ken nawaya-wayaan da.
Kuna na a saan nga agpangadua a mangipaay ti pagmenna-mennaan dagiti maseknan no masita da iti maikadua a gundaway a panagsalungasing iti curfew hour.
Ti maysa a balasang ket taga Brgy. Catangraran, Solsona ken ti kadua na a balasang ket agtawen ti 21, residente iti ili ti Banna ken agpada nga agtrabtrabaho iti dakkel a mall.
Inbatad ni Baltazar nga awan met ti sabali nga ubra da idi nasita da malaksid iti palawag da a panagdownload ti pelikula ken application iti cellphone itay parbangon.
Inpasingked na iti pannakikoordinar na iti management ti dakkel a mall mainaig iti pannakausar ti wifi nupay natapuganen ti curfew hour manipud iti alas otso ti rabii agpatingga iti alas singko ti parbangon.
Kabayatanna, pinalagipan manen ni Baltazar dagiti maseknan a no malpas iti trabaho ket dagus da nga agawid kadagiti pagtaengan wenno iti pagkaseraan da.
