LAOAG CITY – Natiliw dagiti dua a babbai babaen ti bileg ti warrant of arrest iti ili ti Vintar.
Nabigbig dagitoy a da Marilyn Agbayani y Rambac, adda iti umno a tawen, maysa a negosyante ken residente iti Brgy. 34 Isic-isic ken ni Leonila Duquez y Mercado, ken residente iti Brgy 21, Malampa iti nasao nga ili.
Segun iti PNP, Duquez ket natiliw iti Brgy. 24 Alsem iti nadakamat nga ili idinto a ni Agbayani ket naarestar iti barangay da.
Ti warrant of arrest ket inpaulog ni Hon. Judge Cahrles Javier M. Calapini, Presiding Judge 3rd Municipal Circuit Trial Court, Sarrat-Vintar, Ilocos Norte.
Naarestar ni Agbayani babaen iti panangiserbi dagiti otoridad ti warrant of arrest gapo iti panaglabsing na iti B.P. BLG. 33 wenno ti Illegal Sale of Petroleum Products a napetsaan ti Pebrero 10, 2021.
Ti met warrant of arrest kontra kenni Duquez ket gapo iti panaglabsing na iti ART. 172 Falsification by Private Individual and Use of Falsified Documents a napetsaan ti Marso 8 ita met laeng a tawen.
Narekomendaren met ti 30 a ribo a pisos a pyansa ni Agbayani idinto a ni Duquez ket 36 a ribo a pisos.
