LAOAG CITY – Dua a balay iti Barangay Dibua South ditoy ciudad ti Laoag ti nauram.
Segun kenni Merwin Cadeliña, iti istorya ti kabsat na ket agay-ayam ti apoy iti dalikan dagiti dua a kaanakan da nga isu ti patyen da a nangrugyan ti uram.
Inbatad na a ti agtagikua kadagiti dua a balay ken lola na a ni Nenita Ventura ken ti ipag na a ni Fe Cadeliña.
Kunana a ti nauram a dua a balay ket ado ti karton iti abay na ken lima nga indibidwal ti agnanaed kadagitoy.
Mainaig iti daytoy, kuna met ni Fire Officer 3 John Patrick Anghel, ti chief investigator ti BFP-Laoag nga itay 12:34 ket nakaawat da ti tawag mainaig iti maur-uram a balay ken indeklara da a fire control kalpasan ti maysa nga oras.
Inlawlawag na nga iti asideg ti dalikan ket ado dagiti nakatambak a karton ken kaykayo a pagsungrod.
Kuna na pay a maibilang a ti maysa kadagiti nauram a balay ket totally damaged.
Agpapan maisursurat ti damag ket saan pay a nakasarita dagiti kameng ti BFP dagiti maibagbaga a dua nga ubbing.
Innayon na nga awan met ti nasugatan iti napasamak nga uram malaksid laeng iti panagnerbyos ti baket.
