LAOAG CITY – Natiliw dagiti dua a driver gapo iti panangpeke da ti antigen test result da ken nasita dagitoy iti border control iti ili ti Pagudpud.
Basar iti PNP-Pagudpud, dagiti dua a natiliw agtawen ti 32 ken 44, agpada a residente iti Claveria Cagayan ken agtrabtrabaho da iti maysa nga LPG Company iti Sanchez Mira iti nasao met laeng a probinsya.
Inbatad dagiti otoridad a dagitoy ket lumabas ditoy Ilocos Norte ken mapan da kuma iti probinsya ti Bulacan ken naglugan da iti LPG Tanker.
Idi adda da iti border control ti ili ti Pagudpud ken idi inpresentar da ti antigen result da ket recieving form laeng a saan a mismo a resibo.
Gapo iti daytoy, inberipikar dagiti otoridad iti MHO iti Sanchez Mira ditoy a naduktalan a saan nga inisyu ti nadakamat nga health office ti dokumento.
Iti agdama, adda iti kustudyar ti PNP dagiti dua a driver para iti naan-anay nga imbestigasyon ken posible a mapilaan ti kaso dagitoy.
