LAOAG CITY – Umaboten iti 403 a gas stations ti nagserra kabayatan ti panagngato ti presyo dagiti produkto a petrolyo ditoy pagilian.
Daytoy ti inbatad ni Philippine National Police (PNP) spokesperson Police Brigadier General Randulf Tuaño.
Segun ken ni Tuaño, adda ti pakabuklan a 14,313 a gas stations ti namonitor ti Philippine National Police iti intero a pagilian.
Inrakurak ni Tuaño nga im-imbestigaren da no ania ti makaigapu ti panagserra dagiti gas stations babaen ti pannakikoordinar da iti Department of Energy (DOE) tapno madeterminar no adda ti napasamak nga hoarding wenno profiteering.
Innayon ni Tuaño a ti agdama a fuel supply ket manamnama nga agpaot agingga iti katengngaan ti bolan ti Abril ita a tawen.
Kabayatanna, adda metten dagiti kaso a naipila gapu iti illegal a panaglako ti produkto a petrolyo, hoarding, ken profiteering partikular iti Nueva Vizcaya, Eastern Samar, ken Albay.
Immunan nga inrakurak ti Philippine National Police a paigetan da ti agmonitor kadagiti gasoline stations kalpasan nga adda dagiti report a nagsardeng ti operasyon da.
