LAOAG CITY – Napilaanen ti kaso a panaglabsing ti Republic Act 9165 wenno Comprehensive Dangerous Drugs Act of 2002 dagiti dua a drug personality a naarestar iti naiwayat nga anti-illegal drug buy-bust operation iti Barangay Sulbec iti ili ti Pasuquin.
Segun ken ni Police Major Sheryl Guzman, ti chief of police iti ili ti Pasuquin, dagiti suspek ket agtawen ti 42, taga Tarlac City ngem agnanaed iti Barangay Caraoan iti ili ti Pasuquin ken ti agtawen ti 41, naasawaan, backhoe operator ken taga Barangay Barbaqueso iti ili ti Carasi.
Maipalagip a kinemmeg a dagus dagiti otoridad dagiti suspek kalpasan a naglako da ti maatap a shabu nga agdagsen ti 0.15 grams iti nagpammarang a poseur-buyer.
Iti panangkapkap dagiti otoridad kadagiti suspek ket naalaan da pay dagitoy ti tallo a sachet a maatap a shabu,
sangaribo a pisos a nausar iti operasyon, sumagmamano a drug paraphernalia ken maysa a calibre 22 a paltog nga adda ti bala na.
Nagtalinaed dagiti suspek iti Philippine National Police iti ili ti Pasuquin.
