LAOAG CITY – Nagkabil dagiti dua a gwardya iti agsinnumbangir a kumpanya iti ili a San Nicolas.
Nabigbig dagitoy a da Arnel Salvatierra a residente iti Barangay Barong iti ili ti Dingras ken ni Adonis Tabones, residente iti Barangay 19, San Lorenzo iti ili ti San Nicolas.
Segun kenni Police Master Sergeant Meynard Valerio, dinanog ni Tabones ni Salvatierra kalpasan a pinabasol na daytoy nga isu ti nangtudok ti ligay ti kotse na babaen ti lansa.
Inlawlawag ni Valerio nga awan met ti nagbalin nga ummuna a susik dagiti dua a mabalin kuma a rason tapno aramiden ni Salvatierra ti mangtudok ti ligay iti lugan ni Adonis.
Nupay kasta, kuna ni Valerio nga adda ti katrabahoan ni Tabones a karirriri ni Salvatierra nga isu ti mapapati nga agidandanon ti saan nga agpaypayso nga istorya kenni Tabones.
Naamoan manipud kenni Valerio a naminduan a daras a natudok ti ligay ni Tabones.
Kabayatanna, pilaan ni Salvatierra ti kaso nga physical injury ni Tabones.
