LAOAG CITY – Nakairecord ti City Health Office ditoy ciudad ti Laoag ti 2 a kaso ti Leptospirosis.
Daytoy ti kinumpirmaran ni Dr. Rodrigo Catcatan, ti mangidadaulo iti City Health Office ditoy ciudad ti Laoag.
Segun kenkuana, ti maysa a naapektaran ti nasao a sakit ket agnanaed iti Brgy.1 ken agtrabtrabaho iti dakkel a mall ditoy ciudad a possible nga isu ti nakaalaan na gapu iti panagdalos na iti bodega.
Inpakaammo pay ni Catcatan a ti maikadwa a naapektaran ti leptospirosis ket residente iti Brgy. Bengcag ken addaan ti meat shop no sadinno a rumrumuar a ditoy met ti nakaalaan na iti nasao a sakit .
Inbatad ni Catcatan nga agpada a naikabil iti ospital dagiti pasyente ngem nakaruwar da metlaeng a dagus.
Mainaig iti daytoy, inpasigurado ni Dr. Catcatan nga iti umdas nga agas particular ti Prophylaxis iti City Health Office nga inpaay ti Department of Health ken iti Provincial Health Office.
Inbatadna a libre dagiti agas a maipaay kadagiti umili ditoy ciudad kangrunaan na dagiti maiyup-uper iti layos nga addaan iti sugat iti parte iti bagida.
Kabayatanna, nagpalagip ti doktor iti publiko a kanayon nga agbuggo ti ima ken iti bagi bagi, kasta met nga agusar ti sabon no dimmalyasat iti layos gapu ta mabalin a kontaminado ti isbo ti bao a mangitunda iti sakit a leptospirosis.
