LAOAG CITY – Natiliw dagiti dua a lalaki gapu iti panagpeke da ti antigen test result iti Border Control iti ili ti Badoc.
Segun ken ni Police Staff Sergeant Jacky Chan Cajigal, nabigbig dagiti suspek a da Louie Bacalucos y Madelo, agtawen ti 34, maysa a driver ti Isuzu Truck ken Romeo Macabitas y Escalante, agtawen ti 32, maysa a helper ken agpada dagitoy a residente ti Brgy. 122 idiay Caloocan City.
Inbatad na nga iti pannakainspeksion dagiti rumbeng a maipakita a requirements sakbay dagitoy a mapalubusan a sumrek ditoy probinsia ket masdaaw dagiti kameng ti pulisia nga agbanbantay ti Border Checkpoint no apay a xerox copy ti inparang da a kopya ti antigen test result.
Gapu iti daytoy, kuna ni Police Staff Sergeant Cajigal a bineripikar da daytoy a banag babaen iti panagtawag da iti nailanad nga ospital ti naipakita kadakuada a certificate a Tagudin Mobile Clinic and Wellness Center.
Inlawlawag na a basar iti nasao nga ospital ket awan ti nagan dagiti suspek a dimmalan ti antigen test.
Babaen iti daytoy, kunana a ditoy a napaneknekan a peke ti antigen test result nga inpakita dagiti maseknan.
Innayon na nga agturong koma dagiti suspek iti ciudad ti Batac tapno ideliver dagiti agricultural equipments.
Kabayatanna, iti agdama ket adda pay laeng iti kustodyar ti PNP Badoc dagiti suspek para iti maiyannatop a pannusa kontra kadagitoy.
