LAOAG CITY – Sumango dagiti dua nga inbidual iti kaso a panaglabsing ti article 308 ti Revised Penal Code wenno theft gapu iti panagtakaw dagitoy ti kalding iti Brgy. 19 iti ili ti San Nicolas.
Binigbig ni Pol. Capt. Ashley Cacayorin iti Deputy chief of police iti Philippine National Police San Nicolas dagiti suspek nga agtawen ti 18, residente iti Brgy. Rayuray iti siudad ti Batac ken agtawen ti 34 a residente iti Brgy. Paoay iti isu met laeng a siudad ken agpada dagitoy a lallaki nga aggatgatang ti bote, lata ken landok.
Segun ken ni Cacayorin, immuna a nagkamanag kadakuada ni Mrs. Rowena Dela Cruz y Deuz, agtawen ti 50, naasawaan, ken residente iti Brgy. 18 San Pedro iti nasao nga ili gapu iti mapukpukaw nga uppat a kalding na.
Inbatad na a gapu iti daytoy ket dagus a nakaikoordenar kadagiti kabangibang nga stasyon ti kapulisan.
Inpakaammo na a babaen iti PNP Batac ket nagreport ti maysa a pagilaklakoan dagiti suspek kadagiti takaw a kalding ken babaen iti pannakaikoordenar daytoy ket dagus a nadanon ti lugar dagiti suspek.
Inbatad ni Cacayorin nga apaman a natiliw dagiti suspek ket narekobre kadakuada dagiti uppat a kalding.
Kabayatanna, agpapan a maisursurat ti damag ket naiproseson ti agtawen ti 18 ti piyansa na idinto a nagtalinaed iti provincial jail ti kadua na a nagtakaw.
