LAOAG CITY – Nangrugin ita nga aldaw, Hunio 1 ti lima nga aldaw a pannakaisayangkat ti Brigada Eskwela iti Buttong Integrated School ditoy siudad ti Laoag.
Segun ken ni Mrs. Elnora Tamayo, Brigada Eskwela Coordinator iti nasao a pagadalan, napateg daytoy a nationwide program ti Department of Education tapno maisagana ken maiplastar a naimbag dagiti classroom dagiti agad-adal sakbay nga agsubli dagitoy iti pagadalan kalpasan ti dua a bulan a panagbakasionda.
Inbatadna nga adda ti naikeddeng nga schedule dagiti nagannak, kapulisan, alumni coordinators, stakeholders, nagduduma nga organisasion manipud iti Barangay Buttong, Barangay Nalbo, Barangay 51-A, Barangay 51-B ken Barangay Raraburan, Army Reservist ken dadduma pay para iti panagdalus dagitoy.
Inlawlawagna a mangnamnamada a ngumato ti bilang dagiti enrollees para ita a tawen nangruna ket addan ti Grade 11 iti pagadalanda.
Kunana nga umabot iti agarup 800 ti bilang dagiti enrollees iti napalabas a tawen.
Innayonna nga agpaut ti Brigada Eskwela agingga inton Biernes, Hunio 5.
