LAOAG CITY – Nagbinnagkong ti dua a lallaki iti Sitio Lab-labig, Barangay Balaoi iti ili ti Pagudpud.
Ti biktima ket agtawen ti 20, awanan asawa, helper ken residente ti Sitio Gaoa, Barangay Balaoi iti ili ti Pagudpud.
Ti suspek ket agtawen ti 18, awanan asawa, helper ken tubo iti Zone 5, Barangay Bagu, Pamplona, Cagayan ngem agdama nga agnanaed iti Barangay Balaoi iti ili ti Pagudpud.
Naitaray ti dua iti Bangui District Hospital para iti naan-anay a pannakatamingda.
Basar iti imbestigasion ti Pagudpud Municipal Police Station, kabayatan nga agiinum ti biktima ken ti suspek kaduada ti lima pay nga indibidual ket adda ti saan a panagkinnaawatan dagitoy.
Gapu iti daytoy, dinanog ti suspek ti biktima agingga nga innala ti suspek ti kitchen knife manipud iti bag daytoy ket ditoy a binagkongna ti biktima iti namindua a daras.
Mainaig iti daytoy, inagaw ti biktima ti kitchen knife manipud iti suspek no sadinno a binagkongna met daytoy ti namindua a daras.
Kabayatanna, naammoan a naiyakar ti biktima ken suspek iti Mariano Marcos Memorial Hospital and Medical Center iti siudad ti Batac.
