LAOAG CITY – Naarestar dagiti dua a lallaki gapu iti panagsalungasing da iti Presidential Decree 705 wenno Illegal Logging ken ti RA 9175 wenno Chainsaw Act of 2002 iti Sitio Caguran, Brgy. Pancian iti ili ti Pagudpud.
Segun ken ni Police Captain Eduardo Santos, Chief of Police ti PNP Pagudpud, kadua da dagiti sumagmamano a kameng ti PNP Pagudpud, mangibagi ti CENRO iti Northern Ilocos a nakabase iti Bangui, RMFB1 ken 1st PMFC a nagturong iti forested area ti Brgy. Pancian.
Kunana a dagiti suspek ket agtawen ti 55 a residente ti Sitio Tinamburan ken ti maysa ket agtawen ti 45 a residente ti Sitio Cadaanan, agpada dagitoy a naasawaan ken mangngalap iti nasao a barangay.
Inbatad na a naaktuan da ti panagpukan dagiti dua a suspek ti white lawan.
Inlawlawag na a nakumpiskar ti maysa nga unit ti Stihl Chainsaw ken dagiti kayo nga addaan ti kaatiddog a 1,469.96 a kadapan a mapatta-patta nga agbalor ti 73,498 pesos nga isu ti indeklara ni Forester Mark Ruel Juan a nangasistar kadakuada kabayatan iti pannakaisayangkat ti inventory ken scaling.
