LAOAG CITY – Kinumpirmaran ni Police Master Sergeant Jay-ar Agtang, chief investigator iti PNP iti ili ti Banna nga adda ti napasamak nga insidente ti panagpang-or iti nasao nga ili.
Nabigbig ti suspek a ni Noriel Bautista y Dadi, agtawen ti 25, baro ken residente iti Barangay Caray iti ili ti Nueva Era idinto a dagiti nagbalin a biktima na ket da Noel Jay Rosas y Baylan, agtawen ti 12, ken ni Nathaniel Caluya, agtawen ti 14, agpada a taga Barangay Poblacion iti met laeng nasao nga ili.
Iti eksklusibo nga interview ti Bombo Radyo ken ni Agtang, inbatad na a napan dagiti biktima iti Barangay Macayepyep iti ili ti Banna a nakalugan ti kurung-kurung tapno bisitaen da ti pagayam da nga agnagan ti “Bong”.
Nupay kasta, iti panagawid dagiti biktima ket maipagarop a sinada ida ni Bautista ken kellaat na lattan a binasnutan ti rupa ni Rosas a nakairamanan ni Caluya babaen ti maysa a kayo nga agatiddog ti 32 a pulgada.
Iti agdama, nagtalinaed pay laeng ni Rosas iti Mariano Marcos Memorial Hospital and Medical Center iti ciudad ti Batac ken agtultuloy pay laeng a maob-obserbaran gapu ta ti mata na ti maipagarop a napakaroan.
Kabayatanna, inbatad ni Agtang a naiget a naglikudan ti suspek nga isuna ti nangpang-or kadagiti biktima, ngem adda dagiti nakakita a mangipaneknek ti inaramid na.
Nagtalinaed ni Bautista iti PNP-Banna ken manamnama a maipila ita nga aldaw ti maiyannatop a reklamo kontra iti nasao a suspek.
