LAOAG CITY – Natay ti nangiturong ti motorsiklo kalpasan ti panagdinnungparda iti maysa met laeng a motorsiklo iti paset ti C5 Road iti Barangay 20 San Jose iti ili ti Sarrat.
Segun ken ni P/Capt. Kester Arellano, Hepe ti Sarrat Municipal Police Station, nabigbig ti biktima a nangiturong ti motorsiklo a Yamaha Mio I a ni Alfred Gacula y Estrada, agtawen ti 47 ken residente ti Barangay Fortuna iti ili ti Marcos idinto a nabigbig met ti nangiturong ti Honda Click 125 a ni Jules Fernandez y Daguio, agtawen ti 21, awanan asawa ken residente ti Barangay Valenciano iti ili ti Banna.
Inbatadna a basar iti inwayatda nga imbestigasion, kabayatan a dumaldalyasat ti nangiturong ti Honda Click 125 nga agturong nga agpa-daya ket kellaat nga immagaw ti linya iti kalsada ti nangiturong ti Yamaha Mio I a nangitunda ti panagdinnungparda.
Gapu iti daytoy, nagsagaba ti nakana a sugat iti ulo ti nangiturong ti Yamaha Mio I nga insigida a naitaray iti Dingras District Hospital para iti naan-anay a pannakatamingna ngem naideklara a dead on arrival babaen ti attending physician a ni Dr. Jacquelyn Hernando idinto a nagsagaba met ti sugat ken gasgas iti nagduduma a paset ti bagi ti nangiturong ti Honda Click 125 kangrunaanna iti akinkannigid a luppona.
