LAOAG CITY – Nasugsugatan dagiti dua a nakamotorsiklo kalpasan a nakapadungpar da ti walang nga aso iti paset ti Barangay Manuang iti ciudad ti Batac.
Nabigbig ti driver ti motorsiklo a ni Jordan Marquez ken adda ti lubbon na a lalaki.
Segun keni Police Lt. Col. Michael Agoncillo, ti chief of police ti Batac, bayat nga agpapaamyanan a direksyon dagiti biktima ket kellaat nga adda ti limmasat nga aso a nangitunda ti pannakadesgrasya da.
Gapo iti daytoy, nasugsugatan ti ima ken luppo dagiti nadakamat a biktima ken dagus a naitaray da iti ospital iti met laeng nasao a ciudad.
Inbatad na a marigatan da a mangbigbig no siasinno ti agtagikua iti nasao nga aso gapo ta awan ti mangayat nga agsao kadagiti tattao iti nasao a lugar.
Kabayatanna, kuna ni Agoncillo a maysa kadagiti problema da ket adda latta dagiti residente iti nasao a ciudad a mangbaybay-a kadagiti taraken da nga aso a nakawalang uray naiget ti panangipatungpal da iti pannakaigalot dagiti aso.
