LAOAG CITY – Inpaayan ni Presidente Ferdinand Bongbong Marcos Jr. ti pammigbig ti dua a natay a piloto ti Philippine Air Force.
Daytoy ket kalpasan a nagsuek ti naglugananda nga FA-50 fighter jet idiay Bukidnon idi Martes.
Naideretso ti bangkay ti dua a piloto idi kalman iti Villamor Airbase no sadinno a sinabat daytoy ni Presidente Marcos.
Immunan nga inbilin ni Presidente Marcos ti alisto nga imbestigasion iti nagbalin a rason ti nasao nga aircraft.
Inbatad met ti Philippine Air Force a manamnama a maammoanen iti kabiitan a panawen ti nangitunda iti panagsuek ti aircraft gapu ta narekoberen ti flight data recorder daytoy.
Inpasingked ti gobierno a saan a masayang ti amin a sakripisio ti dua a piloto para iti pagilian ken maipaay ti nasken a tulong kadagiti napanawan a pamilia dagitoy.
