LAOAG CITY – Nasugatan ti dua a senior citizen kalpasan a naminpinsan a nauram ti dua a kadsaaran a pagtaenganda iti Barangay 6 San Agustin ditoy siudad ti Laoag.
Nagsagaba ti sugat iti ima, bukut ken ulo dagiti nasao a senior citizen ken insigida a naitaray dagitoy iti kaasitgan nga ospital para iti naan-anay a pannakatamingda.
Alisto a nagramram ti apoy gapu ta naaramid laeng iti light materials ti nasao a balay a nangitunda ti napuskol nga asok.
Mainaig iti daytoy, segun ken ni Fea Agullana, estudiante ti Data Center College of the Philippines ken maysa kadagiti lima nga estudiante nga agkaskasera iti abay ti nauram a pagtaengan, kabayatan a matmaturog isuna ket kellaat daytoy a nakariing gapu iti ariwawa ken ringgor iti ruar.
Inbatadna nga inpagarupna nga immuna nga adda laeng ti agririri iti kalsada ngem apaman a rimmuar daytoy iti pagtaengan a pagkaskaseraanda ket nakitana a dakkelen ti apoy.
Gapu iti daytoy, kunana nga insigida a nagsubli isuna iti pagkaskaseraanda tapno riingen dagiti kakaduana a matmaturog pay laeng iti kadayta a gundaway.
Inlawlawagna a gapu iti insidente ket sumagmamano laeng ti naisalbarda a kagamitanda ken nabasbasa dagiti libroda.
Kabayatanna, nauram pay iti likud a paset ti kotse iti kaabay ti nauram a pagtaengan pakairamanan dagiti mula dagitoy.
Iti agdama, agtultuloy pay laeng ti naun-uneg nga imbestigasion ti Bureau of Fire Protection ditoy siudad ti Laoag iti napasamak nga uram.
