LAOAG CITY – Dua a senior citizens ti natakawan iti Barangay 1 iti ili ti Bacarra.
Immunan a natakawan ni Mr. Rudy Sagisi no sadinno nga inlawlawag na iti Bombo Radyo Laoag nga adda ti nangserrek iti tianggi da a naipatakder iti sangwanan laeng ti balayda.
Inbatad na a naipagagangayen nga isuna ti agriing a nasapa tapno mapan manglukat iti gate ken ridaw iti tianggi da para kadagiti nasapa a mapan gumatang.
Nupay kasta, kuna na nga adda ti gundaway a naduktalan na laengen nga adda ti nangserrek iti tianggi da ken innala dagiti suspek ti naglakoan da a sumurok-kumurang a 500 a pisos.
Mamati ni Sagisi a karruba da metlaeng ti adda iti likudan ti krimen ken mabalin a nabayag nga inadal ti suspek ti garaw na.
Iti baet ti napasamak ket saanen a pinanggep pay ni Sagisi ti napan nagreport iti Philippine National Police.
Kabayatanna, ti maikadwa a natakawan ket ni Trinidad Rivera no sadinno nga iti palawag na iti Bombo Radyo Laoag ket nagturong ti suspek iti pagtaengan da tapno damagen ti nagan ti kapitan ti nasao a barangay.
Inlawlawag ni Rivera nga apaman a naamoan ti suspek ti nagan ti kapitan iti barangay da ket pimmanawen idinto nga isuna ket napan iti likud ti balay da tapno agputed ti kayo.
Istorya ni Rivera a kalpasan a nakaputed ti kayo ket nagsubli iti sango ti balay da, ngem ditoyen a nakita na a nakalukat ti bag na a nakaparabaw iti tugaw nga abay ti radyo na.
Innayonna nga iti panangbukitkit na iti bag a ket awanen ti kwarta na a sangaribo a pisos ken ti cellphone na nga agbalor ti 7 ribo a pisos.
Gapu iti napalalo a luksaw ni Rivera ket nagsangsangit a nagkiddaw ti tulong kadagiti karruba na no sadinno nga inpakaammo kenkuana dagiti dua nga ubbing a nakita da ti lalaki a nagsaludsud kenkuana a nagsubli iti pagtaengan na nga isu ti maatap a nangala ti kwarta ken cellphone na.
Basar pay kadagiti ubbing ket naglugan ti nalabbaga a kotse ti suspek.
Atapen ni Rivera a saanda a kalugaran ti suspek gapu ta tagalong ti panagsarita na.
Kuna ni Rivera nga inpakaammo na a dagus ti napasamak kenkuana iti kapitan ti barangay da.
Mainaig iti daytoy, nagturong ti news team ti Bombo Radyo iti balay ti kapitan ngem naamoan nga adda ti napanan ti opisyal.
Inpalgak met ti Philippine National Police iti ili ti Bacarra a saan a naireport kadakuada dagiti nasao a pasamak.
