LAOAG CITY – Iparuk-at ita nga aldaw ti gobierno ti pagannurotan iti panangipaay ti P10 iti kada litro a fuel subsidy kadagiti driver kadagiti pampubliko a lugan.
Iti press briefing iti Malacañang, inbatad ni Land Transportation Franchising and Regulatory (LTFRB) Board Chairman Atty. Vigor Mendoza II a nakasaganan ti pundo nga ilatang para iti daytoy.
Kunana a sakup daytoy ti P10 iti kada litro a fuel subsidy ti sumurok 142,000 a jeep ken UV express nga agbibiahe iti intero a pagilian.
Inlawlawagna nga umabot iti 14,000 a gasolinaan iti pagilian ti makipaset iti panangipaay ti fuel subsidy.
Gagem ti programa a matulungan dagiti drivers ken pasahero a makissayan ti mapaspasaran ita nga agtaltalinaed ti presio ti petrolyo.
Maipapan met kadagiti PUV a karaman iti service contracting program ti gobierno, inpasigurado ti Land Transportation Franchising and Regulatory a mabayadan dagiti operator iti kabiitan a panawen.
Mangiparuk-at met ti Land Transportation Franchising and Regulatory ti baro a fare matrix para iti 20 a porsiento a diskuento iti amin malaksid pay iti agdama a diskuento kadagiti senior citizen, persons with disabilities ken dagiti estudiante.
