LAOAG CITY – Sinnungbatan ni Bicol Saro Partylist Representative Terry Ridon ti rakurak ti Malacañang a panagbasura ti impeachment article a mabalin a makurangan ti publiko gapu ta naidatagen dagiti ebidensia kontra ken ni Vice President Sara Duterte iti Senado.
Segun ken ni Ridon, respetarenna ti nagbalin a rakurak ni Palace press officer Claire Castro no sadinno dagiti ebidensia kadagiti dakes nga aramid ti Bise Presidente ket naidatagen iti Senado manipud iti Hulio.
Kadagiti naglabas ken manarimaan nga impeachment articles ket naipresentaren iti Senate Impeachment Court ken adda iti Korte ti desision basar kadagiti ebidensia a naipresentar.
Immunan nga inbatad ni Castro a ti panagbasura iti bribery case ken ni Duterte ket arig inallilaw dagiti Pilipino gapu ta ammoda ti intero a kinapudno.
Malaksid iti daytoy, immunan nga inanunsio ni Manila Rep. Joel Chua nga ibasuradan ti bribery case kontra ken ni Duterte.
Nalpasen nga inpresentar ti prosecution ti dua nga impeachment articles, maysa iti panangpanta ti Bise Presidente iti biag da Presidente Ferdinand Marcos Jr., first lady Liza Araneta-Marcos ken dati nga Speaker Martin Romualdez kabayatan a ti maysa ket mainaig iti saan nga umno a panaggastosna iti P612.5 million a confidential fund.
