LAOAG CITY – Inpakaammo ni Dr. Charlie Batin, Bamboo Program Leader iti MMSU dagiti wagas a maar-aramid para iti Bamboo production and rehabilitation.
Segun ken ni Batin, dua a teknolohiya ti napartuat ti MMSU para iti panagtalinaed ti napintas ken nabuslon a suplay ti kawayan.
Kuna na a maysa ditoy ti one node cutting technology, maysa a kaalistoan a wagas tapno ado ti mapatanur a kawayan.
Inbatad na a babaen iti nasao a tekonolohiya, masapol a mangpili ti napintas a maimula a kawayan a maysa wenno dua a tawen.
Inpakaammo na a masapol nga agrukod laeng daytoy iti innem aginnga iti walo a pulgada ken maimula iti darat tapno alisto nga agramot wenno agsaringit ti bamboo cutting.
Mainaig iti daytoy, inlawlawag ni Batin nga iti panagimua ken masapol nga adda iti slant position ken iti laeng bigat ken malem a masibugan,
Kuna na a kalpasan ti 15-25 nga aldaw ket mabalin nga iyakar ti naimula a kawayan iti plastic bag nga addaan ti garden soil, rice hull, organic fertilizer ken bio fertilizer ken ipan laeng iti init kalpasan ti dua a bulan.
Segun ken ni Batin, apaman a makaapit kadagiti napatanor a kawayan wenno bamboo propagules ket mabalin nga ilako iti 100 agingga iti lima a ribo a pisos iti kada pad.
Kabayatanna, inbatad ni Batin a maysa pay a teknolohiya nga us-usaren ti unibersidad ket ti pop eye technology wenno rehabilitasyon para kadagiti kawayan.
Kuna na a babaen iti daytoy, masapol a madalusan dagiti pagmulaan ti kawayan tapno makapatanur iti ad-ado a rabong.
Inbunannag na malaksid iti daytoy ket maliklikan ti panagbalay ti uleg wenno bao iti kakawayanan ken mapagtalinaed a napintas ti kalidad daytoy.
Immunan nga inpakaammo ni Batin a ti kawayan ket isu ti katayagan a ruot ken umuna a mangrugi kas rabong.
Addaan daytoy ti 1,500 nga usar ditoy Pilipinas ken 60 ti klase na.
Innayun ni Batin a ti kawayan ket dakkel a katulungan iti pananglapped ti panagreggaay ti daga.
Gapu iti daytoy, kuna na a kas addang ti MMSU a mangtulong kadagiti bamboo farmers ket napartuat ti nagduduma a teknolohiya.
