LAOAG CITY – Inyistorya dagiti dua a topnotchers manipud ditoy probinsya, iti kaliplipas a Licensure Examination for Teachers (LET) ti kapadasan da sakbay a nagun-od da ti balligi.
Segun kenni Mr. Mark Jayvee Esteban, manipud iti ili ti Banna ken Top 4 iti LET, maysa kadagiti kangrunaan a karit ket ti namin-ado a gundaway a naitantan ti eksaminasyon gapo iti covid-19 pandemic ken dimteng iti punto a maaw-awanan ti namnama.
Inbatad na a kageddan ti eksaminasyon ket isu met ti pannakatay ti ipatpateg na a lola na.
Nupay kasta, kunana a babaen iti pammati na iti Diyos, panagayat ti pamilya ken papagayam na, pakairamanan ti nobya na ket nakabaelan na a naipasa ti eksaminasyon ken nagbalin pay a Top 4.
Kunana a napalaos ti kinaragsak na ngem arig na ket saan pay a nagsink-in kenkuana ti balligi.
Dinakamat na nga idi ubing ket saan nga agbalin a mangisursuro ti arapaap na no diket agbalin a Presidente ti Pilipinas ngem iti panagdakkel na ket naaprisyar na ti sakripisyo dagiti teachers na nga isu metten ti nakagutigot kenkuana a mangala ti kurso a kina-maestro.
Inpalgak na nga ado man ti sumangbay a problema wenno pannubok iti biag ngem nasken a saan a daytoy ti lapped para iti panagballigi.
Kabayatanna, kuna ni Mr. Jonathan Agullana, Top 10 iti LET a saan a mapugsat ti isem na iti nagun-od na a balligi para iti bagbagi ken iti pamilya na pakairamananen ti Ilocos Norte.
Inbatad na a maysa kadagiti karit met kenkuana ket ti panangbingay na ti oras na gapo ta bayat nga agrev-review ket adda ti trabaho na.
Dinakamat na a nagduduma a problema ti sinango na sakbay ti panagballigi na kas iti namitlo a panagakar na iti pagtaengan, agpabpabasa iti kabsat na ken ti negatibo a sasao ti tattao nangruna nagturpos kas Summa Cum Laude.
Nupay kasta, inlawlawag na a babaen iti gagar, determinasyon ken pammati na iti bagbagi na ket nakabaelan na ti nagballigi ken maysa kadagiti topnotchers.
Mainaig iti daytoy, inbatad na nga idi ubing ket agbalin a Piloto ti arapaap na ngem bayat ti panagtulid ti panawen ket nakita na ti “calling” na nga agbalin a maestro.
Daytoy ket gapo ta kayat na met ti makatulong kangrunaan na kadagiti agtutubo a makagun-od met iti arapaap da iti biag.
Ni Esteban ket nagturpos kas Magna Cum Laude idinto a ni Agullana ket kas Summa Cum Laude iti Data Center College of the Philippines ken daytoy ti ummuna a gundaway a nageksaman dagitoy.
