LAOAG CITY – Natiliw dagiti dua a wanted person iti nagsina nga operasyon ti PNP-CIDG ditoy probinsya.
Ummuna a natiliw ni Pompeo Saludares y Valenica, agtawen ti 57, balo, tricycle driver ken residente iti Barangay Sulquiano iti ili ti Dingras, ken nakemmeg iti paset ti Barangay Albano.
Ni Saludares ket naarestar babaen ti bileg ti warrant of arrest nga inparuk-at ni Hon. Nida Alejandro, ti Presiding Judge iti RTC Branch 12 ditoy ciudad ti Laoag idi Agosto 24 ita tawen.
Sumangsango daytoy iti kaso a panaglabsing iti RA 9175 wenno Chainsaw Act of 2002.
Sumaruno ket ni Fernando Barroga y Pascual, agtawen ti 40, construction worker ken residente iti Barangay Nagpatpatan iti ili ti ili ti Solsona.
Naarestar met daytoy iti Barangay 21, San Marcos iti ili ti Sarrat gapo iti kaso na nga homicide.
Inparuk-at met laeng ni Alejandro ti warrant of arrest ni Barroga.
Nairekomendar met nga agpyansa ti 120 a ribo a pisos ti nadakamat nga akusado.
Iti agdama ket nagtalinaed iti kustudiyar ti PNP-CIDG dagiti indibidwal a natiliw.
