LAOAG CITY – Natiliw dagiti dua a lallaki iti naisayangkat nga anti-illegal drug buy bust operation iti paset ti Barangay 53, Rioeng ditoy ciudad ti Laoag.
Nabigbig daytoy nga isuda Rocky Baloan, agtawen ti 32 ken ni Romnick Obando, agtawen ti 24, agpada a residente ti Barangay 22, San Cristobal iti ili ti Sarrat.
Nakumpsikar dagiti otoridad ti maysa a sachet a maipagarop a naglaon ti shabu, sangaribo a pisos a nagatang ti nagpammarang a police posuer buyer ken maysa pay a sachet manipud iti ikot na, 1300 a pisos, dua a cellphone na ken lisensya.
Manaig iti daytoy, naiget a naglikudan ni Baloan dagiti naala nga iligal a droga gapo ta maysa laeng daytoy a negosyante.
Segun kenni Baloan, idi napan nagdeliver ket adda ti motorsiklo nga immovertake ket kuna ti driver nga agrisak ti lugan da iti likod.
Gapo iti daytoy, nagsardeng da Baloan ket idi bimmaba ket dinamag ti nakamotorsiklo no siasinno ti Rocky ken maipagarop a ditoy a nadanog-danog isut gapo na a nagtaray.
Inlawlawag na nga idi nakamatan da isuna ket napagpakleb ken maipagarop nga addan dagiti dua a sachet a kinaot da iti bulsa na.
Inpetteng na a saan a drug surrenderer ken awan pulos ti iligal nga aramid na seknan iti iligal a droga ken daytoy ti damo na mairaman iti operasyon.
