LAOAG CITY – Nakagun-od ti world record ti maysa a pares a nasisirib nga aso gapu iti talentoda kas ti panagisalapay ti bado ken panangitennag ti barya iti bote.
Pinadayawan ti records keeping organization a Guinness World Records dagiti aso nga isuda da Bonnie ken Simba ti world record titles a “Fastest time to complete 10 side leapfrog jumps by two dogs (16.78 seconds),” “Most bottles deposited into a recycling bin by a dog in one minute (16 bottles),” “Most coins deposited into a bottle by a dog in one minute (13 coins),” ken “Most clothes hung on a washing line by a dog in one minute (17 socks).”
Segun iti owner ken trainer da Bonnie ken Simba a ni Olga Jones, challenging ti panag-train kadagiti dua nga asoda ngem ti panangisuroda kadagitoy nga agisalapay ti medyas ti karigatan ken dimmanon ti naunday a panawen.
Naammoan a naisuroda pay kadagiti aso iti tulong ti naurnos a communication, fun ken mutual trust.
Gapu iti daytoy, adda ti nasurok a 200 tricks a kabaelan nga aramiden da Bonnie ken Simba.
Kabayatanna, gapu iti kinasirib dagiti asoda ket nakipaset dagitoy iti talent reality show a “Britain’s Got Talent” no sadinno napabilib dagiti celebrity judges kas ken ni Simon Cowell.
