LAOAG CITY – Inpakaamo ni PCapt. Joseph Tayaban iti PNP Badoc a dua manen dagiti natiliwan a nagusar ti peke nga RT-PCR test result.
Kuna ni Tayaban a dagiti natiliw ket agpada nga engineer manipod iti Metro Manila ken agturong kuma iti ili ti Dumalneg partikular kadagiti maipatpatakder a cell site.
Inlawlawag na nga iti pannakacheck dagiti dokumento iti border checkpoint iti nasao nga ili ket naduktalan a peke ti inpakita da nga RT-PCR Test.
Inbatad ni Tayaban nga awan ti dry seal ti nasao a resulta ken saan a rimuar ti nagan da iti listaan dagiti dimmalan iti test.
Mainaig iti daytoy, kuna na a basar iti palawag dagiti maseknan ket inted ti ahensya a pagpapaayanda ti test result nu pay saanda a dimmalan iti swab testing.
Gapu iti daytoy, kuna ni Tayaban a napilaan dagiti dua ti kaso a panagsalungasing iti Article 174 ti Revised Penal Code ngem nakapagpiyansa da metlaeng ken nagsubli dagitoy iti Metro Manila.
Saan met pay a msinunuo ti hepe nu ana ti rason a makadaldalyasat dagiti adda ti peke a resulta iti checkpoint kadagiti probinsya a madalanana sakbay iti probinsya nga Ilocos Norte.
