LAOAG CITY – Naarestar ti dua nga indibidual iti nagsina nga anti-illegal drug buy-bust operation ditoy ciudad ti Laoag.
Immuna a naisayangkat ti operasyon iti Brgy. 10, San Jose ditoy ciudad ti Laoag a nakatiliwan ni alyas Topi, agtawen ti 32, awanan ti asawa, pintor, Street Level Individual ken residente metlaeng iti nadakamat a barangay.
Kinemmeg a dagus dagiti otoridad ti suspek kalpasan a naglako ti maysa a sachet a naglaon ti maipagarop a shabu nga agbalor ti sangaribo a pisos iti nagpammarang a poseur-buyer.
Nakumpiskar amin iti ikot ti suspek ti 4 nga heat-sealed transparent plastic sachets a naglaon ti maatap a shabu, maysa a fragmented broken glass nga addaan ti white crystalline residue, maysa a black/brown coin purse, maysa nga open transparent plastic sachet, ti sangaribo a pisos a nausar iti operasyon ken ti personal a kwarta na a P246.00.
Simmaruno a naarestar iti Barangay 13 ditoy ciudad ti Laoag ti agtawen ti 44, awanan ti, retailer, ken residente iti Fonacier St., Brgy. 14 ditoy ciudad kalpasan a naglako ti maysa a sachet a naglaon ti maipagarop a shabu nga agdagsen ti 1.1 grams iti nagpammarang a police poseur buyer.
Nakumpiskar pay iti ikot ti suspek ti maysa a pedaso ti heat sealed transparent plastic sachet a naglaon ti 6.0 grams a maatap a shabu, maysa a nangisit nga sling bag, maysa a genuine one-thousand-peso bill a nausar kas buy bust money; P1,004.00; dua nga open transparent plastic sachets; ken dadduma pay a personal a kagamitan ti suspek.
Agdagsen amin ti 7.1 grams dagiti nakumpiskar a maatap a shabu iti suspek a mapatta-patta nga agbalor ti P48,280.00
Iti agdama, nagtalinaed dagiti suspek iti Philippine National Police ditoy ciudad ti Laoag ken maisagsaganan ti kaso a panaglabsing iti Republic Act 9165 wenno Comprehensive Dangerous Drugs Act of 2002 a maipila kontra kadakuada.
