LAOAG CITY – Nagsagaba ti sugat dagiti dua nga indibidual kalpasan ti napasamak a pammaltog iti Barangay Sagpatan iti ili ti Dingras.
Nabigbig dagiti biktima nga isuda Henson Aguiran, agtawen ti 43, naasawaan ken ni Roldan Deuz, agtawen ti 34 idinto a ti suspek ket ni Sammy Alejo, agtawen ti 24.
Segun kenni Police Captain Norman Pentang, ti chief of police ti Philippine National Police iti ili ti Dingras, nakaawat da ti tawag idi 8:30 idi rabii a nangipakammo nga adda ti napaltogan.
Inbatad na a dagus da a nagturong iti lugar ket naduktalan da a napasamak ti pammaltog iti paset ti Padsan River.
Iti inisyal nga imbestigasyon, idi napaltogan dagiti biktima ket nagtaray ni Aguiran iti Poblacion Area idinto a ni Deuz agturong kadagiti kabalbalayan iti nasao met laeng a barangay.
Naamoan a ni Aguiran ket naipan iti Piddig Hospital ngem nagbalin nga out-patient idinto a ni Deuz ket naitaray iti Dingras District Hospital ngem naiyakar iti Mariano Marcos Memorial Hospital and medical Center iti ciudad ti Batac nga iti agdama ket adda iti Intensive Care Unit (ICU).
Inlawlawag na nga iti panagsalsaludsod dagiti otoridad kadagiti biktima ket binigbig da ti suspek a dagus met laeng a natiliw iti Barangay Mandaloque babaen iti hot pursuit operation.
Nakumpiskar met dagiti otoridad ti maysa a magazine nga addaan ti lima a bala ken manarimaan ti panangbirok da iti paltog nga inusar ti suspek.
Mainaig iti daytoy, iti met nakalap nga impormasyon ti Bombo Radyo Laoag manipud iti pamilya Aguiran, dagiti biktima ket mapan da agpabola iti STL ken nakalugan da iti motorsiklo nga agturong iti Barangay Root ken ditoy a sinada ti suspek ken pinalto-paltogan na dagitoy.
Naamoan pay a ti suspek ket saan pay unay a nabayag a rimuar iti pagbalodan.
Desidido met ti maysa kadagiti biktima a mangipila ti reklamo kontra iti suspek.
Iti agdama, adda iti kustudiyar ti Philippine National Police ti suspek bayat nga agtultuloy ti naun-uneg nga imbestigasyon dagiti otoridad seknan iti pammaltog.
