LAOAG CITY – Kinumpirmaran ni Barangay Chairman Melvin Santos iti Barangay 1 ditoy ciudad ti Laoag nga adda ti dua nga indibidwal a napan nakiminatay iti lugar da nga aggapo idiay Caloocan City.
Nabigbig dagitoy a da Rosel Flores, 28 ken Ruth Leah Flores, 31 ken isu ti kabsat ti natay iti lugar da ken dagiti kinakuyog da ket da Ruleth Borces, 47 ken Maro Borces, 31 nga isu ti agtagikua ti lugan.
Segun kenni Santos, da Ruleth ken Maro ket rumrumwar nga adda ti inpakita da nga IATF I.D. iti checkpoint iti ili ti Badoc.
Inbatad na a dagiti maseknan ket simmangpet iti rabii ti Mayo 10, Domingo.
Kunana pay nga addan ti mandar na a madis-infect ti lugar ken manamnama a mamonitor met dagiti nakapulapol dagiti dua.
Gapo iti daytoy, kuna ni Santos a plano na a bilinen dagiti tanod iti barangay da nga igetan da pay ti panagbantay tapno saanen a maulit daytoy kangrunaan na ita a panawen ti GCQ.
Iti agdama, dagiti dua nga indibidwal a naggapo idiay Caloocan City ket adda iti Hotel del Norte.
Kabayatanna, inlawlawag ni Police Captain Joseph Tayaban, ti chief of police ti PNP-Badoc a saan na nga ammo nga adda ti kadwa dagiti dua nga addaan ti IATF I.D. a naggapo idiay Caloocan ken napan iti Barangay 1 ditoy ciudad ti Laoag.
Segun kenni Tayaban, masapol a maimbestigar no apay a nakastrek dagiti nasao nga indibidwal ken no mapaneknekan a nagbasol dagitoy ket mabalin da a mapilaan ti reklamo.
Inbatad na nga adda ti limitasyon da iti panag-checkpoint no sadinno a palukatan da ti lugan ken no ado ti karga na ket mabalin met a ditoy nga aglemmeng ti tao.
Kunana pay a no kalikagom ti maysa a tao nga ipalusot ti pada na a tao ket ado ti wagas nga aramiden na.
Nupay kasta, kunana naiget ti iyus-uswat da a panangsita kadagiti amin a sumrek ditoy probinsya ken inadmitir na a saan da a perpekto.
Nagpanawagan pay kadagiti mangimanmando ti barangay checkpoints nga igetan da ti panagbantay gapo ta isu ti katulungan da iti daytoy a panawen.
Inlawlawag na nga iti agdama ket saan da pay a nadeterminar no anya ti trabaho dagiti dua nga indibidwal.
Innayon na a saan dan a kayat a maulit daytoy rason nga igetan da pay ti panagcheckpoint.
