LAOAG CITY -Inbaga ni Police Major Joseph Tayaban, ti chief of police iti ili ti Badoc a pilaan da ti kaso babaen ti regular filing dagiti dua nga OFW a sumrek koma ditoy probinsya gapu iti panagusar da ti peke a dokumento partikular ti RT-PCR test result.
Iti interview ti Bombo Radyo Laoag ken ni Tayaban, inbatad na a dagiti suspek ket agtawen ti 29 ken 24, agpada nga OFW ken taga Puerto Princesa, Palawan.
Kuna na a mapan koma dagiti nasao nga OFW iti Department of Foreign Affairs (DFA) iti ili ti San Nicolas gapu ta adda ti appointment da.
Nupay kasta, gapu iti naiget a panaginspeksyon dagiti otoridad iti border control iti ili ti Badoc ket naduktalan a ti RT-PCR test result dagiti dua nga OFW ket peke.
Inpakaammo ni Tayaban a timmawag da iti Manila Diagnostic Center for OFW tapno iberipikar no pudno a negatibo ti RT-PCR test result dagiti dua ngem naamoan da a positibo dagitoy iti covid-19 virus.
Gapu iti daytoy, naideretso dagiti nasao nga OFW iti isolation facility iti ili ti Badoc, ken mapilaan da ti kaso a falsification of documents.
Innayon ni Tayaban a ti aramiden da ket bayabayen dagiti kameng ti pulisya dagiti dua ken dagiti tallo pay a kakadwa da agingga idiay Metro Manila a naggapwan dagiti maseknan.
Segun kenkuana, mai-deny entry dagiti maseknan gapu ta saanda a mabalin nga ibalud dagitoy kalpasan a nagpositibo da ti covid-19 virus.
Inpetteng ni Tayaban a malaksid iti panangpeke dagiti dua nga OFW ti RT-PCR test result da ket nagiwaras da pay ti virus.
