LAOAG CITY – Kinumpirmaran ni Brgy. Chairman Gerardo Gaoat Bgry. Colo iti ciudad ti Batac ti pannakalmes dagiti dua nga ubbing iti small water impounding system iti nadakamat a lugar.
Nabigbig dagiti dua nga agkasinsin nga ubbing da Janice Aganus Bal, agtawen ti 14 ken ni Jamell M. Sagun nga agtawen ti 8.
Basar iti impormasion, iti alas-dose ti pangaldaw ket nagturong dagiti dua nga ubbing iti kataltonan, pakairamanan ti lola ken inna da tapnu agala ti bisukol ngem maipagarup a napan nagdigos dagiti dua nga ubbing iti small water impounding system nga isu metten ti pannakalmes da.
Gapu iti daytoy, nagkiddaw ti tulong dagiti maseknan ken dagus a nagresponde dagiti kameng ti Bureau of Fire Protection ken ti Philippine National Police iti ciudad ti Batac.
Mainaig iti daytoy, ket naitaray dagiti biktima iti Mariano Marcos Memorial Hospital and Medical Center ngem pimmusayen dagitoy gapu iti nabayag a panangiya-on dagituy manipud iti nakalmesanda.
Kabayatanna, ikarkarigatan ti News Team ti Bombo Radyo Laoag nga alaen ti komento iti Bureau of Fire Protection ken Philippine National Police iti ili ti Batac ti naan-anay nga impormasion iti pannakamalmes dagiti dua nga ubbing.
