LAOAG CITY – Dua ti pimmusay manipud kadagiti lima nga indibidual a nakimat iti Barangay Tartarabang iti ili ti Pinili.
Segun kenni Police Senior Master Sergeant Noel Gamit, ti chief investigator iti PNP-Pinili, dagiti pimmusay a biktima ket agtawen ti 17 ken agtawen ti 35.
Inlawlawag ni Gamit nga itay bigat ket agraraep dagiti biktima idi kellaat a nagkimat ken natamaan dagiti lima manipud kadagiti 10 nga indibidual a napan nakiraep.
Naamoan a tallo kadagiti lima a biktima ket agkakabsat ken maysa kadagitoy ti pimmusay.
Dagus met a naitaray dagiti biktima iti ospital iti nasao met laeng nga ili ngem naideklara a dead on arrival ti dua kadagitoy.
Iti agdama, dagiti tallo a nasugatan ket agdama a maob-obseraran ti kasasaad da iti ospital.
Kabayatanna, kuna ni Gamit a daytoy met ti ummuna a gundaway nga adda ti nakimat iti nasao nga ili.
