LAOAG CITY – Dumanon iti 23,622 a residente manipod iti lima a barangay idiay Canlaon City, Negros Oriental ti naibakwit kalpasan ti ‘phreatic explosion’ ti Bulkan Kanlaon idi Lunes ti rabii.
Daytoy ti inpadanon a report ni Canlaon City, Negros Oriental Mayor Jose Chubasco Cardenas iti Office of Civil Defense 7 maipapan iti assessment kadagiti pamilia a naapektaran ti panagbettak ti Kanlaon.
Ti nasao bilang ket umabot iti 40% ti pakabuklan a populasion ti siudad a nairekord iti 58,822 no sadino nga iti agdama ket dumanon iti 155 a pamilia ti napan kadagiti evacuation centers.
Basar iti report ti Provincial Disaster Risk Reduction and Management Council, dumanon iti 84 a barangay manipod iti 10 a siudad ken munisipalidad ti naapektaran ti panagbettak ti bulkan.
Inyetnag ti Provincial Disaster Risk Reduction and Management and Council iti “Blue Alert” ti intero a probinsia ti Negros Occidental kalpasan ti napasamak a volcanic activity.
Am-ammoen pay laeng ti lokal a gobierno no adda ti biktima iti napasamak a panagpugso ti plume ti bulkan.
Kabayatanna, posible a maipangato iti Alert Level 3 ti sitwasion iti Mt. Kanlaon no bilang agtultuloy ti panagalburoto ti bulkan ken no kumaro ti monitoring parameters daytoy.
Daytoy ti inrakurak ni Philippine Institute of Volcanology and Seismology Director Teresito Bacolcol maipanggep ti agdama nga status ti Kanlaon.
Kunana nga agbalin nga alerto dagiti umili iti aglawlaw ti bulkan gapu iti manamnama a magmatic eruption ken ashfall a mairekrekord kadagiti sumagmamano a lugar idiay Negros Oriental ken Occidental gubuay iti vulcanic gas ken sulfur dioxide nga ipugpugso ti bulkan.
Inbatadna a no bilang nga agtalinaed ti monitoring parameters, maaddaan ti phreatic explosive eruption ngem no ag-decline met ti monitoring parameters, mabalin met nga isubli iti alert level 1 ti status ti bulkan.
Maipalagip a dimmanon iti lima a kilometro ti explosive eruption ti Bulkan Kanlaon rason a naipan daytoy iti alert level 2 idi Lunes ti rabii.
Rumrummuar a phreatic explosion ket nangitunda ti sobra a kinabara ti panawen.
Inpasingked met ni Philippine National Police-Directorate for Police Community Relations (DPCR) Chief, PMGen. Bernard Banac nga adda ti umdas a kagamitan ti pulisia tapno aresponde iti aniaman nga emergency ken tulong kagiddan ti napasamak a panagbettak ti bulkan Kanlaon.
