LAOAG CITY – Immapela ni Vice Mayor Vicentito Lazo iti Committee on Good Government ken Committee on Environment nga imbestigaren no kasano ken apay a natiliw ti maysa a city dumptruck gapo iti iligal a panag-quarry.
Daytoy ket iti laksid nga adda ti gratuitous permit ti ciudad ti Laoag sipud pay idi miembro pay laeng isuna ti Sang. Panlalawigan.
Segun kenni Lazo, natiliw ti dumptruck babaen iti Dept. Of Environment Natural Resources (DENR) gapo iti iligal a panag-quarry na iti Barangay Sta. Maria.
Inlawlawag ni Lazo a nakailanad iti gratuitous permit a nai-isyu iti lokal a gobierno ti ciudad ket Barangay Tangid ngem naiyuswat ti maipagarop nga iligal a panag-quarry iti Barangay Sta. Maria.
Inpetteng na a masapol a maduktalan no siasinno ti responsable iti napasamak gapo ta saan a rumbeng a mapasamak daytoy.
Kabayatanna, kinumpirmaran ni Engr. Manuel Aurelio, ti mangidadaulo ti City Engineering Office a nagmultan ti personnel a nangiturong iti natiliw a dumptruck gapo iti maipagarop nga iligal a panag-quarry na iti Barangay Sta. Maria ditoy ciudad ti Laoag.
Segun kenni Aurelio, ammo na nga adda ti gratuitous permit ti ciudad nga iti Barangay Tangid ti lokasyon ti quarry.
Inbatad na ti palawag dagiti personnel a napan iti Barangay Sta. Maria ket maipagarop a datin nga adda ti nakitkita da manipud iti kapitolyo probinsyal a nag-quarry.
Gapo iti daytoy, napan met nag-quarry dagiti maseknan iti nadakamat a barangay ken ti daga ket maipan iti Barangay 11 ditoy ciudad para iti maipatakder a barangay hall.
Nupay kasta, kuna ni Aurelio a ti nagalaan dagiti maseknan ket iti mismo tengnga a sirok ti bypass bridge isut gapo na a posible a daytoy ti nangrugyan ti pannakatikaw.
Kunana a ti tengnga a paset ti bypass bridge ket boundary ti Barangay Tangid iti abagatan a paret ken Barangay Sta. Maria iti amyanan.
Dinakamat na nga inadmitir dagiti personnel a napan da nag-quarry iti nadakamat a lugar rason a nagmulta gapo iti panaglabsing da iti panag-quarry.
Innayon na a makita a nalaing ti lokasyon ti panakiyuswatan ti panag-qurry tapno saanen a maulit pay ti pannakatiliw ti dumptruck ti ciudad.
