LAOAG CITY – Inkari ni dati a Presidente Rodrigo Duterte nga itultuloyna ti panangipatungpal ti war on drugs ken doblienna ti bilang dagiti pimmusay iti kanito a mangabak kas Mayor idiay Davao City inton 2025 Midterm Elections.
Daytoy ti inbatad ti Presidente iti panagdengngeg ti House of Representatives quad committee a mangim-imbestigar iti war on drugs iti napalabas nga administrasion.
Inadmitirna iti panagdengngeg nga inbilinna dagiti pulis a tiliwen dagiti agar-aramid ti droga, dagiti dadakkel a distributor ti droga ken palubusanna a matay dagitoy amin.
Idi saludsoden met isuna ni Sta. Rosa City Rep. Dan Fernandez, Chairman ti House Committee on Public Order and Safety no ‘disappointed” iti panagbaba ti bilang, sungbat ti dati a Presidente, isublina dagiti numero iti umiso a dana no maikkan manen daytoy ti gundaway nga agbalin a Presidente.
Maipalagip a ni Duterte ket nangipila ti Certificate of Candidacy-na idi Oktubre para iti kina-Mayor ti Davao City no sadinno a makabinnalubalna ni dati a Civil Service Chief Karlo Nograles.
