LAOAG CITY – Nagsublin ti regular duty dagiti amin a personnel iti Philippine National Police (PNP) iti ili ti Currimao kalpasan ti sumagmamano nga aldaw a panag-self quarantine da iti mismo a PNP-Station.
Daytoy ti inpakaammo ni Police Major Arnel Tabaog, OIC iti PNP iti ili ti Currimao.
Immuna iti daytoy, naibilin ti panagself-quarantine dagiti amin a kameng ti pulisya iti ili ti Currimao kalpasan a nagpositibo ti covid-19 ti maysa a kadwa da.
Nupay kasta, idi laeng aldaw ti Domingo, abril 12 ket nakarwaren daytoy iti Mariano Marcos Memorial Hospital and Medical Center iti ciudad ti Batac.
Maragsakan ni Tabaog gapu ta makatulungen dagiti PNP personnel iti ili ti Currimao iti ipatpatungpal da a checkpoints kabayatan ti Enhanced Community Quarantine (ECQ) gapu iti covid-19.
Inpakaammo ni Tabaog nga iti baet a nagsublin iti normal ti operasyon iti PNP-Currimao ket agtalinaed pay laeng iti lugar ken itultuloy na ti agmonitor iti nagduduma a barangay gapu ta isu ti pammilin ni Provincial Director Police Col. Christoper Abrahano.
Kabayatanna, kinumpirmaran ni Tabaog nga adda iti ili ti Currimao ti pulis a nagpositibo ti covid-19 partikular iti Mothering Center tapno ditoy nga agself-quarantine iti uneg ti 14 nga aldaw kalpasan a nakarwaren iti ospital iti ciudad ti Batac.
Inpasigurado met ni Tabaog nga awan ti panagpanic dagiti residente iti ili ti Paoay iti kaadda iti lugar ti pulis a nagpositibo ti covid-19.
