LAOAG CITY – Agpinnirma ti Divine Word College of Laoag ken Governor Roque Ablan Senior Memorial Hospital ti memorandum of agreement para iti pannauksar dagiti medical equipments babaen kadagiti nursing students.
Segun kenni Sang. Panlalawigan Member ken Chairman ti Committee on Education Atty. Saul Paolo Lazo, babaen iti daytoy a wagas ket matulungan dagiti agad-adal tapno ad-adda pay a makasursuro dagitoy, saan laeng nga iti akademya no diket pakairamanan ti aktwal a panangtaming kadagiti pasyente.
Inbatad na a dakkel a tulong daytoy kadagiti nursing students tapno mapapintas ken mapasayaat pay ti pannakaipadanon ti health services kabayatan nga agad-adal pay laeng dagitoy.
Inlawlawag na a kalikagom ti nasao a pagadalan a dumur-as pay ti quality ti edukasyon babaen iti pannakaisuro ken panagbayabay ti ospital.
Kunana a babaen iti bileg ti MOA ket maipalubos a mausar dagiti hospital facilities ti GRASMH babaen kadagiti estudyante ti DWCL tapno mapadasan da ti pudno a sitwasyon nga ar-aramiden dagiti healthcare workers. Innayon na a gagaem ti gobierno probinsyal nga ad-ado pay nga agblin a nurse ken doctor a nasirib ditoy probinsya gapo iti naiget a panagsanay da kadagiti hospital facilities.
