LAOAG CITY – Naiyalat ti Ecuador ti umuna a panangabak kontra iti host country a Qatar iti opening game ti FIFA World Cup 2022 iti Al Bayt stadium nga addaan iti 60 a ribo a kapasidad.
Iti gagar dagiti rinibo a football fans a nagturong iti nasao nga stadium, naidumduma a ragsak ti narikna da iti panaglukat ti FIFA World Cup kangrunaan kadagiti residente iti Qatar iti baet a naruay aa kritisismo ti nasagrap ti pagilian gapu kadagiti polisiya na.
Nupay kasta, iti panagay-ayam dagiti players ti Qatar ken Ecuador, nakanselar ti umuna a goal ni Forward Enner Valencia iti Ecuador babaen ti heading gapu ta nalabsing ti offside ti maysa kadagiti teammate na kalpasan a nareview ti replay, iti maikatlo a minoto.
Naan-anay a nakagun-od ti goal ni Valencia iti Ecuador iti maika-16 a minotos iti panagay-ayam na babaen ti penalty shot.
Sakbay pay nga agngudo ti halftime wenno sakbay a malpas ti umuna nga 45 a minotos, nakaipastrek ti maikadua a goal ni Valencia iti maika-31 a minotos a panagay-ayam na.
Gapu iti daytoy, naipaayan iti dakkel a problema ti Qatar no kasano na nga abruten ti dua a lamang ti Ecuador.
Maysa pay a nagrigatan ti Qatar ket iti depensa gapu kadagiti uppat a yellow card wenno nakaaramid da iti foul kontra iti Ecuador.
Kabayatanna, sumaruno nga agay-ayam ita nga aldaw ket iti nagbaetan ti England ken Iran iti Group B a maangay intono alas-nuebe ti rabii iti Khalifa International Stadium, ti national stadium iti Doha,Qatar.
