LAOAG CITY – Pinirmaan ni Presidente Ferdinand Marcos Jr. ti Republic Act 11996 wenno ti “Eddie Garcia Law” tapno masalakniban ken masigurado ti pagimbagan dagiti mangmangged iti industria iti pelikula ken iti telebision.
Nakailanad iti linteg ti pannakaipatungpal ti oras ti panagtrabaho, sueldo ken dadduma pay a benepisio a mainaig iti social security wenno dadduma pay a benepisio, nangruna iti salun-at, kinatalged, kasasaad ken pagalagadan ti panagtrabaho, ken dagiti insurance.
Sakbay a mangrugi iti trabaho, masapul nga umuna nga addaan ti aktor wenno empleado iti telebision ken pelikula iti katulagan wenno kontrata iti panggedan a mapirmaan iti lengguahe a maawatan ti tunggal partido.
Dagiti maduktalan a naglabsing iti aniaman a paset ti linteg ket mamulta agingga iti P100,000 iti umuna a panaglabsing, agingga iti P200,000 iti maikadua a panaglabsing, ken agingga iti P500,000 iti maikatlo ken dagiti sumaganad pay a panaglabsing.
Maipalagip a naitandudo ti Eddie Garcia Law kalpasan a pimmusay ti beterano nga aktor a ni Eddie Garcia iti aksidente bayat ti kaaddana iti set ti pelikula idiay Tondo, Manila idi 2019.
