LAOAG CITY – Inyuswat ni Presidente Ferdinand Marcos Jr. ti Education Philippines wenno EduPhil tapno maitampok ti Pilipinas kas destinasion dagiti international student a kalikagum ti mangala ti higher education, mangisayangkat ti research ken dumalan iti training iti pagilian.
Iti Executive Order No. 124, binigbig ti administrasion ti napateg a papel ti international education iti panagdur-as ti ekonomia, panangitandudo ti innovation, cultural diplomacy, human capital development ken international cooperation.
Gagem ti EduPhil a papigsaen ti posision ti pagilian kas destinasion para iti higher education, research ken academic exchange iti babaen ti panangpalawa ti academic cooperation, research collaboration ken innovation partnerships.
Pakairamanan pay daytoy ti alisto a panagserrek, panagtalinaed ken panagadal dagiti international student iti pagilian.
Malaksid iti daytoy, makatulong pay iti programa kadagiti higher education institution a mangallukoy dagiti international student, mapalaing ti serbisio nga ipaay kadagitoy ken makaipatungpal dagiti inisiatibo a maiyataday ti gagem ti EduPhil.
Inpatungpal ti Commission on Higher Education wenno CHED kas kangrunaan nga ahensia a mangidaulo iti pannakaipatungpal ti programa.
Iti babaen ti Executive No. 124, inpatungpal ti EduPhil Task Force kas inter-agency body a mangidaulo iti koordinasion dagiti addang para iti pannakaisayangkat ken panangpadur-as ti international education kadagiti higher education institution iti pagilian.
Mainaig iti daytoy agserbi kas secretariat ti Task Force ti Commission on Higher Education wenno CHED ken mangipaay ti kasapulan a teknikal ken administratibo a suporta.
Naisayangkat pay ti EduPhil Portal tapno mapaalisto ti panangipatulod dagiti serbisio ti gobierno para kadagiti international student.
