LAOAG CITY – Nagleppas ni Pinoy pole vaulter EJ Obiena iti maikatlo a puesto Lausanne Leg of the Diamond League idiay Switzerland.
Sibaballigi a nakadanon iti 5.82 a metro iti umuna nga attemptna no sadinno nagtabla da iti maikatlo a puesto kenni Sondre Guttormsen ti Norway ken ni Kurtis Marschall ti Australia.
Amin dagitoy a tallo ket sibaballigi a nag-clear iti bar iti umuna laeng a gandat.
Pinadas ti Pinoy pole vaulter ti dumanon iti 5.92 metro ngem napaay iti maika-tallo nga attempt-na.
Indualoan ti world number 1 ken Paris Olympics gold medalist a ni Mondo Duplantis ti Sweden iti nasao a torneo a nakairekord iti 6.15 meters a linab-awanna ti 6.10 meters a naangay dua a tawenen ti napalabas.
Kabayatanna, maika-dua iti puesto ni Sam Kendricks ti Estado Unidos a nakarekord iti 5.92 meters.
Daytoy ti umuna a torneo ni Obiena sipud idi Paris Olympics ken manamnama a makisalip met iti Silesia leg idiay Poland a maangay inton Agosto 25.
