LAOAG CITY – Nakasaganan ni Pinoy pole vaulter EJ Obiena para iti umas-asidegen a pannakipasetna iti outdoor games.
Makipaset ti World number 4 iti Xiamen leg ti Diamond League inton Abril 26.
Makalabanna ti sumagmamano a pamilyar a nagnagan kas kada world-record holder ken 2024 Paris Olympic gold medalist Armand Duplantis, silver finisher Sam Kendricks ken bronze medalist Emmanouil Karalis.
Inbatad ti inana a ni Jeanette Obiena a naan-anayen a nagimbag ti 6-foot-2 nga anakna gapu iti back injury-na.
Saanen daytoy a nakipaset iti 2025 World Athletics Indoor Championships idi Marso tapno isentro ti ay-ayam iti outdoor.
Maipalagip a nagballigi daytoy iti Taiwan International Pole Vault Championship iti umuna a lawas ti Abril.
