LAOAG CITY – Napintas ti panagannayas ti ekonomia ti Rehion Uno iti napalabas a tawen 2023.
Daytoy ti inpakaammo ni Gov. Matthew Marcos Manotoc, chairman ti Regional Development Council ti Rehion Uno kabayatan ti panangipaay na ti State of the Region Address idiay Bauang, La Union.
Impannakkelna a maikatlo ti Rehion Uno a kangatoan iti “economic performance” iti intero a pagilian a nangipaay ti dadakkel nga oportunidad kadagiti umili.
Imbatadna a ngimmato iti 7.1 a porsiento ti Gross Regional Domestic Product itay napalabas a tawen 2023.
Malaksid iti daytoy, inbunannagna a naipababa pay ti “poverty incidence” kadagiti pamilia manipud iti 15.8% iti umuna nga innem a bulan idi tawen 2021 ket nagbalin a 14.2% iti umuna nga innem a bulan iti tawen 2023.
Innayonna a dagiti naipatungpal nga addang tapno maipangato ti kasasaad ti panagbiag dagiti umili ket babaen iti pannakapasayaat ti employment, livelihood, edukasyon ken panagsanay ti nangitunda iti pannakaibilang ti Rehion Uno a maikanem a “least poor region” iti pagilyan.
