LAOAG CITY – Pormalen a mangrugi ti election period inton bigat, Enero 12 iti intero a pagilian kas panagsagsagana iti mapaspasangasangan a 2025 National and Local Election.
Daytoy ti inpakaammo ni Atty. Julius Balbas, Commission on Elections Officer ditoy siudad ti Laoag.
Segun kenkuana, kageddan iti panangrugi ti election period ket isu met ti panangrugi ti pannakaipatungpal ti gun ban.
Inbatadna nga inton Enero 12, aggegeddan ti pannakaisayangkat ti checkpoint iti intero a probinsia ti Ilocos Norte iti panagbinnulig ti Commission on Elections, Philippine National Police ken dadduma pay a maseknan nga ahensia ti gobierno.
Inlawlawagna a basar iti Comelec Resolution, maipawil ti panagitugot ti paltog nga awan ti pammalubos iti Comelec, availment ti security details ken panagikot ti pagpabettak ken dagiti deadly weapons.
Innayonna a dagiti aglabsing iti daytoy ket sumango iti maysa agingga innem a pannakaibalodna ken awan ti probation-na no sadinno a dagus a maibalod apaman a makombiktaran.
